Ny teninao rehetra
 Ry Tompo tia anay;
 No tsy mba manam-petra
 Fa to mandrakizay;
 Ho levona avokoa,
 Izao rehetra izao,
 Haharitra tokoa
 Zao teninao izao.

 Ny tenin’ny Baiboly
 No sabatra entinay
 Handresy ny devoly,
 ‘Lay fahavalonay;
 Raha misy mampahory,
 Ka osa izahay
 Ny teninao mahery
 Manjary tanjakay

 Fa teny mamy koa
 Ho an’ny mpankato
 Ka loharano soa
 Miboika ao am-po
 Ho fanomezan-toky
 Ny azon’ny manjo.
 Sy hani-mahavoky
 Mamelona ny fo

 Fa teny mampisava
 Ny aizim-be aty.
 Fanilo manazava
 Ny dia ho ary
 Manolo-pahendrena,
 Mananatra ny fo,
 Milaza famonjena
 Sy lova tsy ho lo.

Mel : Samuel Sebastian Wesley 1874 [AURELIA]
Text: Samuel John Stone 1866 "The Church's One Foundation"
MG  : "Ny Teninao rehetra"
Web : http://www.liederschatz.net

 Jesosy no Mpiandry 
 Ny fiangonanay;
 Ny feon’Izy irery
 No feo fantatray.
 Ka tsy mba vala maro 
 Ny fiangonanay;
 Iray tsy hay zaraina,
 Tapahin-Tompo iray.

 Iray no vatolampy
 ‘Zay iorenanay,
 Iray no Fehizoro
 ‘Zay ikambananay,
 Iray no Mofon’aina
 fihinanay ety,
 Iray no antenaina
 Ho azonay ary.

 Tabain’ny hevi-diso
 Kanefa mbola iray;
 Ny saina tsy mitovy
 Tsy mahazara anay;
 Fisoko maromaro,
 Kanefa vala iray;
 Ny Tompo no mpiaro
 Ny fiangonanay.

 Ny teny samihafa,
 Ny fomba tsy miray,
 Tsy misy maharava
 Ny fikambananay,
 Ny fanenjehana aza
 Vao mainka mampiray
 Sy mahatsara laza
 Ny fiangonanay.

 Ry Jeso! Hatanjaho
 Ny fiangonanao.
 Ny fony halalaho
 Mba hitoeranao;
 Izay firaisan-tsaina
 Miseho hatrety,
 Velomy hanana aina
 Hitohy hatrary.

Mel : Samuel Sebastian Wesley 1874 [AURELIA]
Text: Samuel John Stone 1866 "The Church's One Foundation"
MG  : "Jesosy no Mpiandry"
Web : http://www.liederschatz.net

 Ny lohan'ny eklesia
 Dia Jeso Tompony,
 Ny rano aman-teny
 No iorenany,
 Nitady azy Izy
 Ho ampakariny, 
 Nalatsany ny rany
 Ho avo-tsoany

 Na be ny firenena
 Izay ihaviany,
 Iray ny famonjena 
 Izay inoany
 Iray ny antenaina
 Rehefa mby ary;
 Iray no mofon'aina
 Izay fihinany.

 Na dia mba hita aza
 Ny fisarahana,
 Na dia tsy manan-daza
 Ny Fiangonana,
 Miambina ny mino,
 Ka mitaraina hoe:
«Aza ela, ry Mpamonjy,
 Avia, mamonje!»

 Tsy ela dia ho hita
 Ilay Mpampakatra
 Tsy ela dia ho vita
 Ny ady masina; 
 Ny rafy horeseny,
 Ny loza tapitra,
 Fa Izy ho tonga eny
 Am-pitsaharana.

 Iraisany anefa
 Andriamanitra
 Sy ireo izay nahefa
 Ny ady masina.
 Ry Tompo, miarova 
 Anay izay mbola aty,
 Hiraisanay handova
 Ny lanitra aminy.

Mel : Samuel Sebastian Wesley 1874 [AURELIA]
Text: Samuel John Stone 1866 "The Church's One Foundation"
MG  : "Ny lohan'ny eklesia dia Jesosy Tompony"
Web : http://www.liederschatz.net