Capitel:
1
2
3
4
5
Die gantze Heilige Schrifft: Deudsch (Luther 1545)
Die Klaglieder Jeremia
Capitel 5
G
Edenck HERR / wie es vns gehet / Schaw vnd sihe an vnser schmach.
2
Vnser Erbe ist den Frembden zu teil worden / vnd vnser Heuser den Auslendern.
3
Wir sind Waisen / vnd haben keinen Vater / vnser Mütter sind wie Widwen.
4
Vnser eigen wasser müssen wir vmb Gelt trincken / vnser Holtz mus man bezalet bringen lassen.
5
Man treibt vns vber hals / vnd wenn wir schon müde sind / lesst man vns doch keine ruge.
6
Wir haben vns müssen Egypten vnd Assur ergeben / auff das wir doch Brot sat zu essen haben.
7
Vnser Veter haben gesündigt / vnd sind nicht mehr furhanden / vnd wir müssen jrer missethat entgelten.
8
Knechte herrschen vber vns / vnd ist niemand / der vns von jrer hand errette.
9
Wir müssen vnser brot mit fahr vnsers lebens holen / fur dem Schwert in der Wüsten.
10
Vnser Haut ist verbrant / wie in eim ofen / fur dem grewlichen Hunger.
11
Sie haben die Weiber zu Zion geschwecht / vnd die Jungfrawen in den stedten Juda.
12
Die Fürsten sind von jnen gehenckt / vnd die person der Alten hat man nicht geehret.
13
Die Jünglinge haben Mülstein müssen tragen / vnd die Knaben vber dem Holtz tragen straucheln.
14
Es sitzen die Alten nicht mehr vnter dem Thor / vnd die Jünglinge treiben kein Seitenspiel mehr.
15
Vnsers hertzen freude hat ein ende / Vnser reigen ist in Wehklagen verkeret.
16
Die Kron vnsers Heubts / ist abgefallen / O weh / das wir so gesündigt haben.
17
Darumb ist auch vnser hertz betrübt / vnd vnser Augen sind finster
(1)
worden.
18
Vmb des berges Zion willen / das er so wüst ligt / das die Füchse drüber lauffen.
19
ABer du HERR / der du ewiglich bleibest / vnd dein Thron fur vnd fur /
20
Warumb wiltu vnser so gar vergessen / vnd vns die lenge so gar verlassen?
21
Bringe vns HERR wider zu dir / das wir wider heim komen / Vernewe vnser tage / wie vor alters.
22
Denn du hast vns verworffen / vnd bis allzu seer vber vns erzürnet. - Ende der Klagelieder Jeremia.
(1)
Das Gesicht vergehet vns / vnd ist alles schwartz fur den augen / fur grossem jamer vnd leid.
